ما فيش قرار فى الدنيا بيجى وليد الصدفه او وليد اللحظه مع كل الاحترام للأخ وليد . طبعا انا هنا مش بتكلم عن القرارات الانفعاليه يعنى ايه انفعاليه يعنى حضرتك تبقى قاعد كده فى امان الله ويجى بنى أدم تييييييييييت يخرجك عن شعورك تقوم حضرتك خبطه بحاجه فى دماغه تعمله عاهه مستديمه وتقضى عمرك بتاكل عيش وحلاوه اكيد ساعتها مش هتبقى مبسوط بالقرار ده لأن ده مش قرار من الأصل دى حاجه تانيه خالص . انا بتكلم عن القرار المصيرى فى حياه كل واحد اللى ممكن يطلع غلط او صح هى مش دى القضيه. القرار بيبقى جوانا بس مستنين الوقت المناسب علشان ناخد القرار وننفذه اى قرار محتاج وقت للتفكير علشان يطلع للنور يعنى اكيد صاحب القرار قعد يفكر وكمان اخد رأى اهل الخبره واهل الحكمه وصحابه وحبايبه لحد ما قرب يبقى قرار جمهورى. وعادى طبعا انه يطلع غلط هو كل القرارات اللى خدناها فى حياتنا لو طلعت صح هنتعلم امتى وامتى هنقدر نقول على نفسنا بقينا بناخد قرارات صح فى اوقات أصح الا لو خدنا بعض القرارت الغلط وبعد كل ده يجى واحد معدى كده فى الشارع يقول لواحد اخد قرار مصيرى فى حياته بكل سهوله انت ليه اتسرعت . لا سبولى الطلعه دى بقى 😂. ياريت كل واحد يخليه فى نفسه. سبنى اكتشف لوحدى انى اتسرعت عادى بتحصل . ولوطلع القرار متسرع وارعن هتعلم والله وهبقى زى الفل واوعدك القرار الى جاى مش هاخد رايك برضو😛 ومتجيش تعلقلى المشنقه وتأنبنى لأنى انا هعمل ده وزياده مع نفسى مش ضرورى اعرفك او اعرف غيرك . بس عارف لو القرار طلع صح هاجى احط السيخ المحمى فى صرصور ودنك يامعلم😈😈😈
مجرد لمبة 