مجرد لمبة

قصة عن شاب مضطرب نفسيا بسبب طفولة قاسية نتيجة عنف منزلي ، بتشاء الظروف أنه يكون عبقري في الرياضيات لكن المؤسف أنه بيعيش ف وضع بائس وسط حي فقير وبيشتغل عامل نظافة ف معهد ماسوتشوستس لحد ما بيكتشف موهبته بروفيسور ف المعهد ده ، قصة عن شاب فاقد لهويته وميعرفش هو عايز إيه ف حياته بسبب الخوف وسيطرة الماضي علي عقله الباطن .

الفيلم بيظهرلك الإنسان ف الحالة دي لما بيتحب بيتصرف أزاي، بيعامل حبيبته دي أزاي، هيقدر يحبها بكل طاقته وبدون خوف ولا، هيكون عنده الثقة أنه يكمل ؟ .. بيظهرلك أما الإنسان ده تجيله فرصة يخش التاريخ من أوسع أبوابه بسبب عبقريته هيستغل الفرصة ولا هيرفضها ، إنسان زي ده لما يتحط أدام دكاترة نفسيين عشان يعالجوه ويقيموا حالته هيساعدهم ولا هيكابر إقتناعا بأنه مش محتاج علاج ، الإنسان ده هيكون إيه دور صديقه المقرب وهو بيشوف صديقه بيعاند نفسه والناس، بيعاند مستقبله .

الفيلم نفسي من الأفلام اللي بتجمع بين كذا خط ، وخط الرومانسية فيه للناس اللي بتحب قصص الحب المخلوطة بالألم النفسي هيتحب جدا ، وأخيرا فيلم فيه روبن وليامز كدكتور نفسي ده لوحده قصة تانية

الفيلم فاز بكزا أوسكار منهم افضل ممثل مساعد لروبن وليامز ، افضل سيناريو اصلي “ مات ديمون / بن افليك ” .. هما اللي كتبوا القصة وده اول دور ليهم.