مجرد لمبة

المشاهد السطحي لما هيتحط أدامه فيلم زي ده هيشوفه فيلم قديم عن مستشفي مجانين .. لكن الحقيقة الفيلم ده ملحمة وساعات هتحس أنه مليان إسقاطات ع الواقع .

الفيلم حبكته الأساسية عن متهم ف قضايا إغتصاب بيتدعي الجنون عشان يتحط ف مصحة أمراض نفسية بدل السجن لكن الحقيقة بيكتشف أنه دخل سجن أكبر وبيجاهد عشان ينول حريته من تاني . الفيلم هنا مش معركة بين الخير والشر لكن معركة بين الحرية والقمع ، السجين والسجان ، بين جاك نيكلسون والممرضة الديكتاتورية اللي بتمنع كل وسائل البهجة علي المرض والحياة داخل المصحة ما هي إلا روتين وعلاج قاسي بالكهربا بل والعقاب نفسه بالكهربا .

المرضي نفسهم منهم اللي بيعاني من إضطرابات عقلية أو عصبية وهتحس إنك جوة الأحداث بل وهتخاف يبقي مصيرك زيهم لما تشوف شخصية جاك نيكلسون العاقل اللي كان عاوز يدخل الحياة ف قلوب المرضي لكن واحدة واحدة بيلاقي نفسه بقي شبههم، مسجون في سلطة الممرضة الديكتاتورية

الفيلم فاز بـ ٥ أوسكار ، منهم واحد لجاك ومنهم للممثلة اللي عملت دور الممرضة.