تمرين المرايا:
النهارده عايزك تختار حاجه من الأوجاع اللي بتعاني منها وركز عليها ولنفترض وجع القلب ….بص لعنيك في المرايا وأسأل نفسك أنت ليه مش مرتاح وقلبك موجوع؟ الإحساس ده ليه؟انت بتاكل بطريقه صحيه؟أنت خايف من حاجه؟سمعت حاجه زعلتك؟فيه حاجه معكننه عليك وانت سايبها ومبتحلهاش؟ايه الجزء اللي بيوجعك في جسمك لما بتحس احساس وجع القلب والهم؟
قول لنفسك” أنا الحمدلله بتنفس وهخلي بالي من صحتي وهعيش في سلام مع نفسي…أنا بحب نفسي…أنا استحق اكون سعيد…بحب الحياه…وهعيش من غير خوف…أنا في أمان هعيش حياتي وأستريح وقت مااتعب “
دلوقتي ركز على مكان الوجع ولنفترض المعده مثلا ردد ” أنا بحب معدتي…أنا فعلا بحبها…ههتم بأكلي وشربي وصحتي…من حقها تكون معده سعيده وفي صحه كويسه” كرر الكلام ده ٣-٤ مرات
تاني هقولك أنت مش مجنون ولا اهبل…..انت ربنا كرمك وطلب من الملايكه تسجد لك…خلق كل حاجه عشانك وعشان راحتك وطلب منك بس أنك تعبده وتشكره على النعمه دي….اللي بتعمله دلوقتي ده شكر لله على نعمه
الواجب:
دفترك معاك…والقلم…ابدأ فكر واكتب
١-جهز نفسك واسترخي خليك مرتاح وهادي ….خد وقتك……وارتاح…. خليك واثق إن ربنا هيهديك للحاجه اللي تصلحلك الوجع ده وهيرشدك
٢-اتخيل نفسك قاعد وسط جنينه خضرا كلها ورود جميله حاول تغمض عينك وتشم الروايح الحلوه وتتخيل الجمال وقول سبحان الله….حاول ترخي كل عضله في جسمك واستمتع بالجمال….اسأل نفسك انا ليه عندي مشكله؟ انا ليه مش سعيد؟ انا محتاج ايه عشان ابقى كويس ومرتاح؟ ايه الحاجات اللي لو عملتها هكون سعيد؟ خد وقتك وفكر في الاجابات وانت متخيل نفسك وسط الجمال اللي ربنا خلقهولك …..وبعدين امسك القلم وابدأ جاوب الاسئله على مهلك
٣- من الحلول دي أختار حل واحد بس…..واكتب ٣ حاجات تقدر تعملها النهارده عشان تنفذ الحل ده.مثلا: مرهق ومحتاج ترتاح .يبقى ١-خد دش دافي ٢-اسمع موسيقى هاديه ٣-غمض عينيك واسترخي
مجرد لمبة 