مسلسل حديث الصباح والمساء ومشكلة البحث عن الهوية….بمرور الوقت البعيد عن هويته الحقيقيه بيتوه وبيتعب وبيحزن….ده اللي العولمه بتعمله حاليا ….اندماج الثقافات يبدو انه نعمه ولكنه في الحقيقه نقمة للأجيال الجايه

المسلسل بيتناول موضوعات كتير جدا من خلال ٣ عائلات يزيد المصري وعطا المراكيبي والشيخ معاوية، لكن انا حابب اتناول ٣ نقط رئيسية

١- البحث عن الهوية “عتاب من المخرج”
شخصية عمرو واكد “النقشبندي” المسافر اللي لما رجع مصر دخل ف غيبوبة من اول المسلسل ، هو اللي بنخش معاه للعالم اللي ف المسلسل ف الحلم ، بيلف بين الشخصيات بيدور عايز يعرف اصله فبيرجع لنقطة البداية عشان يفهم الحكاية بيروح لجده الكبير “يزيد المصري” ، جده بيعاتبه انه بقالوا كتير بعيد عن أصله ، وبيتعرف على تاريخه طول الحلقات وانه لما فهم اصله وعرف هويته فاق من الغيبوبة ف اخر حلقة ، هنا المخرج بيعاتب المصري ابن القرن ٢٠ وال٢١ وبيقولننا اننا زينا زي النقشبندي ف غيبوبة لأننا مش عارفين هويتنا واننا عمرنا ما هنفوق غير لو عرفنا اصلنا
شخصية داوود باشا اللي خالد النبوي قفلها صح فتمثيل ، طول الوقت تايه ومسافر بين ١٠٠ طريق ، مش عارف هو ايه هو مين مش لاقي سعادته لحد لما بيلاقي نفسه وهويته ف المكان اللي ابتدأ منه رجع لنقطة البداية ، من افضل الشخصيات اللي اتكتبت واتمثلت واتوظفت صح فتاريخ الدراما المصرية 👏

٢- حكايات عبر الازمنة
المسلسل بيخدنا معاه فرحلة بين اوتار السنين زيارة لحقبة مهمة فتاريخ مصر بداية من محمد علي باشا ، بنتمشى مع شخصيات فشوارع المحروسة ونقابل ناسها بندق بابهم وندخل حياتهم ، بنشوف خطوط الزمن وهي بتسيب علامتها على الوشوش، بنشوف حالة كاملة معيشة كاملة للمواطن المصري ، بنزور صفحات مهمة من تاريخ مصر “بنعرف منين جينا وعلى فين رايحيين

٣ – الموت والحياة الرحلة اللي بين النقطتين
هتقدر تفهم ده من اسم المسلسل “الصباح” فجر العمر وبدايته و”المساء” اي النهاية ، وهتقدر تعرف ده كمان من كلمات التتر “دى حكايه متكرّره من يوم ولادة الضىّ
الصبح طفل برئ ومساه يبان تجاعيد وفوق طريق الايام تجرى الحياه مشاوير ونشوف ملامح الزمن متعاده فى المواليد واحنا البشر كلنا اعمار ورق بيطير “
وكمان مشهد عزيز وهو جي يبلغ المراكيبي ان ابوه يزيد مات واللي ف نفس اللحظة ميلاد اول ولد للمراكيبي الموت والحياة في نفس اللحظة

المصدر:المقال من اعداد : كريم الجندي